2020年10月19日 健康日常
俗語話「減肥三分靠運動，七分靠飲食」，原來運動前後食得啱，能夠讓你更有效減肥。
運動前吃什麼？
有時放工打算做一兩個鐘頭gym，但收工太晏冇時間食飯，諗住做完食得豐富啲。如果你有呢個習慣要立即戒掉！因為運動會消耗熱量，如果空肚做運動會有機會因為血糖低而見頭暈，所以運動前一定要進食。
建議運動前數小時可以食得豐富啲，補充足夠碳水化合物、蛋白質、脂肪，例如雞肉飯配蔬菜。如果想減肥效果更顯著，建議選擇低升糖指數(GI)嘅主食，例如糙米、意粉、裸麥粒麵包等。
運動前1小時內都可以進食偏流質碳水化合物及蛋白質，避免運動時胃部不適，建議食物有無糖希臘乳酪、水果如香蕉、蘋果等。不過提提大家，記住進食後至少30分鐘先好做劇烈運動。
運動中吃什麼？
運動中會流失大量水份，建議每運動10至20分鐘補充200-300ml水分。
如果運動前真係無時間進食，中途覺得肚餓，可以補充高升糖指數(GI)食物，例如係全熟香蕉，加快體內血糖上升。
運動後吃什麼？
好多人以為運動後唔食嘢會好快瘦，但其實運動中消耗好多能量，包含血糖及胺基酸，運動後正正係最需要進食嘅時候。
如果晚上運動後完全唔進食，等到第二朝先食早餐，咁樣對身體修復以及新陳代謝都有唔好嘅影響。短期內雖然會瘦，但好快會反彈，而且會容易疲累、面色變差。
運動後建議補充水份、少量碳水化合物及蛋白質，碳水化合物可以維持血液中的血糖，蛋白質有助肌肉蛋白合成，修補因運動受到破壞嘅肌肉組織，甚至可提升代謝率，加速脂肪消耗。
建議食物有吞拿魚麥包三文治、雞肉配焗薯、無糖豆漿配水果、水果配烚雞蛋等等。
Comments